cap.ru сайтри сӑн

Чӑваш патшалӑх аграри университечӗн ӑсчахӗсем ял хуҫалӑхӗнче усӑ курмалли агрегат шухӑшласа кӑларнӑ.

Инженери факультечӗн технопаркӗн специалисчӗсем хӑмлан тунине касмалли дисклӑ хатӗр шутласа кӑларса ӑна патентланӑ.

Ҫӗнӗ хатӗре ятаралса аграрисем валли тунӑ. Вӑл хӑмлан тунисене тирпейлӗ те тӳрӗ касать, ҫапла ӳсен-тӑран тӗрӗс йӗркеленсе паркаланса ӳсет. Ку вара пулас тухӑҫа лайӑх витӗм кӳрет.

Ҫӗнӗ хатӗре Чӑваш Енри хӑмла плантацийӗсенче тӗрӗслесе пӑхнӑ ӗнтӗ. Техника хӑйне лайӑх енчен кӑтартнӑ: шанчӑклӑ тата тухӑҫлӑ. Шӑпах ҫавӑн пекки кирлӗ те ял хуҫалӑхӗнче.

cap.ru сайтри сӑн

Шупашкарта ҫак кунсенче иртнӗ «Ҫӗрулми — 2026» куравра 56 тонна вӑрлӑх ҫӗрулми сутнӑ. Ку – икӗ кунра.

Ҫынсем ыйтнипе вӑрлӑха «Пехет» агромаркетра эрне вӗҫӗччен сутӗҫ. Вӑтам хакӗ – 40-50 тенкӗ, хакӗ категорирен килет.

Аса илтерер: курав пуш уйӑхӗн 4-5-мӗшӗсенче МТВ-центрта тата «Пехет» агромаркетра иртнӗ. Унта Раҫҫейри 18 регионти 78 компани хутшӑннӑ. Мероприятие 12 пин ытла ҫын ҫитсе курнӑ.

Ҫавӑн пекех куравра ЧР Ял хуҫалӑх министерствипе А.Г.Лорх ячӗллӗ ҫӗрулмин федераци тӗпчев центрӗ килӗштерсе ӗҫлесси пирки алӑ пуснӑ.

Палӑртса хӑварар: «Ҫӗрулми» курав 18-мӗш хут иртнӗ.

cap.ru сайтри сӑн

Ӗнер тата паян Шупашкарта «Ҫӗрлуми-2026» курав иртни пирки пӗлтернӗччӗ. ЧР Ял хуҫалӑх министерстви ӗнер курав мӗнле иртнине пӗтӗмлетнӗ.

Ӗнер курава 4 пин ҫын ҫитсе курнӑ, пӗтӗмпе 33 тонна вӑрлӑх ҫӗрулми сутнӑ.

Аса илтеретпӗр: «Ҫӗрулми-2026» курав МТВ-центрта тата «Каскад» суту-илӳ центрӗнче вырнаҫнӑ «Пехет» агромаркетра иртет. МТВ-центр патӗнчи шатерта та вӑрлӑх ҫӗрулми сутаҫҫӗ.

Кӑҫал курава Раҫҫейри 78 регионти 78 компани хутшӑнать. Ҫавӑн пекех ӑсталӑх класӗсем иртеҫҫӗ, ҫӗрулмирен хатӗрленӗ 100 ытла ҫимӗҫе тутанса пӑхма та пулать.

cheb.ru сайтри сӑн

Ыран, пуш уйӑхӗн 4-мӗшӗнче, Шупашкар хулинче йӑлана кӗнӗ «Ҫӗрулми – 2026» курав ӗҫлеме тытӑнӗ.

Кӑҫалхипе виҫҫӗмӗш хут ӗнтӗ вӑл МТВ-центрта иртӗ. Курав унта 5-мӗш хутра пулӗ. Ҫавӑн пекех хальхинче тепӗр вырӑн пулӗ: «Пехет» агромаркет. Вӑл Шупашкарти «Каскад» суту-илӳ центрӗнче вырнаҫнӑ. Икӗ ҫӗрте те вӑрлӑх ҫӗрулми туянма май пулӗ. МТВ-центр патӗнчи парковкӑра шатер та вырнаҫтарӗҫ, унта тата ҫӗрулми сутӗҫ.

Кӑҫал курава Раҫҫейри 18 регионти 78 организаци хутшӑнма палӑртнӑ. Малтанлӑха пӗлтернӗ тӑрӑх, хамӑр патри тата ют ҫӗршывсен селекцийӗнчи 15 сорта хӑтлӗҫ.

Хӑнасем валли программа пуян: ҫӗрулмин тӗрлӗ сортӗнчен хатӗрленӗ 100 ытла ҫимӗҫе тутанса пӑхма май пулӗ. Ҫавӑн пекех республикӑри «Ҫӗрулми УЯВ» конкурса хутшӑннӑ ӳкерчӗксен куравӗ ӗҫлӗ.

Ҫалкуҫ: cap.ru

Чӑваш Республикин Министрсен Кабинечӗ агропромышленноҫ комплексне пулӑшмалли ҫӗнӗ йӗркене ҫирӗплетнӗ. Унччен кашни 6 енпе уйрӑм йӗрке пулнӑ, халӗ вӗсене пӗрлештерсе пӗр пӗтӗмӗшле йӗрке туса хунӑ. Ку федераци саккунӗсемпе килӗшсе тӑрать.

Тӗп улшӑнусем ҫакӑн пек:

• Вӑрлӑх енӗпе: субсидипе халӗ Раҫҫейре ӗрчетнӗ сортсемшӗн кӑна пулӑшаҫҫӗ.

• Ӑратлӑ выльӑх-чӗрлӗх енӗпе: селекцилеме укҫапа пулӑшӗҫ. 2027 ҫулхи кӑрлач уйӑхӗн 1-мӗшӗнчен пуҫласа выльӑхсене ятарлӑ патшалӑх системинче (ФГИС) регистрацилемелле.

• Сӗт туса илессипе: пулӑшу пӗчӗк тата вӑтам усламҫӑсене кӑна лекӗ. Вӗсен тупӑшӗ ҫулталӑкра 800 миллион тенкӗрен иртмелле мар.

Пӗлме: 2026 ҫулта АПК сферине пулӑшма пӗтӗмӗшле 776,6 млн тенкӗ уйӑрнӑ (федераци хыснинчен – 436,8 млн, республикӑран – 339,8 млн).

cap.ru сайтри сӑн

Чӑваш Енри аграрисем ҫурхи ӗҫсене хатӗрленеҫҫӗ. Ку ыйтӑва Чӑваш Республикин Элтеперӗпе иртнӗ планеркӑра сӳтсе явнӑ.

Аграрисем сезона пуш уйӑхӗн иккӗмӗш декадинче пуҫӑнасшӑн, акана вара ака уйӑхӗн пуҫламӑшӗнче тухасшӑн.

Кӑҫал ял хуҫалӑх культурисене 542,7 гектар ҫинче акма палӑртнӑ. Ҫурри ытла – 281 гектар – тыр-пул. Аграрисене ака ӗҫӗсене ирттерме 3,8 млрд тенкӗ кирлӗ.

Чӑваш Енӗн Ял хуҫалӑх министерствин сӑнӳкерчӗкӗ

Шупашкарти сӗт-ҫу завочӗ сӗт йышӑнакан ҫӗнӗ цех уҫнӑ.

Ку завод Атӑлҫи тӑрӑхӗнчи регионсене илсен, асӑннӑ завод сӗт йышӑнакан хальхи вӑхӑтри комплекс шутланать тесе пӗлтернӗ республикӑн Ял хуҫалӑх министерствинче.

Завод 2024 ҫулта калӑпӑшлӑ реконструкци пуҫарса янӑ. Ҫӗнӗ цеха вара уҫни предприятишӗн пӗлтерешлӗ тепӗр утӑм шутланать. Ҫӗнӗрен вырнаҫтарнӑ икӗ модуль харӑсах икӗ машинаран сет йышӑнайрать.

forum.na-svyazi.ru сӑнӳкерчӗк

Кӑрлач уйӑхӗн 22-мӗшӗнче Россельхознадзор управленийӗн ӗҫченӗсем «Шупашкар-Сурски» ҫул ҫинче качакапа ҫула тухнӑ ҫынна тытса чарнӑ. Мӑйракаллӑ пӗчӗк выльӑха пӗр ҫын Муркаш районӗнчен Патӑрьел районне турттарса каясшӑн пулнӑ. Анчах выльӑхӑн ветеринари докуменчӗ пулман.

Надзор ведомствин инспекторӗсем качака хуҫине асӑрхаттару хучӗ ҫырса панӑ.

t.me/Chuv_today каналтан илнӗ сӑнӳкерчӗк

Етӗрне районӗнчи В.И.Чапаев ячӗллӗ заводра ӑратлӑ юртӑ лаша ӗрчетеҫҫӗ.

Асӑннӑ заводра нумаях пулмасть «Знамя труда» (чӑв. Ӗҫ ялавӗ) хаҫат тишкерӳҫи пулнӑ, унти ӗҫ-пуҫа паллашнӑ.

Кӑҫалхи утӑ уйӑхӗн 15-мӗшӗнче завод 100 ҫул тултарӗ.

Заводра паян та хӑйсен ӗҫне чунтан юратакансем тӑрӑшаҫҫӗ. Роман Малов Вячеслав Политов, Виктор Чернышов тата ыттисен ӗҫне тивӗҫлипе малалла тӑсать.

cap.ru сайтри сӑн

Йӑлана кӗнӗ тӑрӑх, ҫуркунне Шупашкарта «Ҫӗрулми» курав иртет. Ҫитес ҫул вӑл пуш уйӑхӗн 4-5-мӗшӗсенче пулӗ.

Темиҫе ҫул ӗнтӗ курава МТВ-центрта йӗркелеҫҫӗ. Хальхинче те ҫавӑнтах пулӗ. Унта вӑрлӑх ҫӗрулми сутнисӗр пуҫне ял хуҫалӑх техникин куравӗ те пулӗ. А.Г.Лорх ячӗллӗ ҫӗрулмин тӗпчев федераци центрӗ тӗрлӗ сортпа паллаштарӗ.